紋身保養及護理 Tattoo Aftercare

Updated: Jul 27, 2019

紋身後數天至幾周爲最重要請好好保養,因每個人體質不同,以下建議可作參考。


  • 頭兩日要避免飲酒,食海鮮,紅肉等比較容易引致皮膚過敏既食物,會有機會影響傷口癒合。另外,爲避免刺激傷口,請穿著鬆身衣服。


  • 傷口會有機會出現墨水同血水滲漏既情況(特別係圖案大既紋身),紋身後第一天可以用保鮮紙包住傷口。


  • 沖涼時緊記用比較凍既水(千其唔好用熱水)。紋身位置要好輕力去清潔,千其唔好大力捽洗個紋身,記得一定要沖乾淨紋身上面既肥皂。沖涼後,用乾淨柔軟既毛巾或廚房紙輕輕力印乾紋身,大約等10分鐘左右自然風乾之後再揸返紋身專用既LOTION就可以。(LOTION一定要好薄,太厚會焗住傷口,容易引起發炎同油脂粒


  • 第一晚訓覺時可包保鮮膜以防止墨水同血水滲漏到被單上。第2日出街都應該包保鮮膜因爲傷口好敏感脆弱,減低細菌感染既機會。之後唔好再包,比個紋身抖氣康復。


  • 紋身後數天傷口出現滲漏係正常傷口癒合過程,不用擔心。


  • 紋身後數天可能會出現紅腫等敏感情況,可用冰袋消腫舒緩不適。如情況嚴重例如發炎(異常紅腫,脹痛同大量滲漏)就要睇醫生。


  • 紋身數天每日最少沖洗傷口2次,早晚各1次,保持傷口清潔通爽,直至傷口完全癒合。另外,每次清洗後都要薄薄地揸專用既LOTION。每次接觸傷口前記得要先洗手。


  • 紋身未康復請勿游泳、浸浴、曬太陽、做大量出汗既活動,起碼等大約3星期至1個月左右,視乎紋身大小和情況而定。


  • 紋身後3-5日會開始出現結焦、甩皮同痕癢等正常情況。唔好用手摸或刮佢,會有機會刮甩個紋身,康復後會無左一忽。痕癢可以輕力用手拍打紋身止痕。記得每日勤揸紋身專用保濕膏,每日4-5次,薄薄地揸,保持傷口滋潤保濕,就會好快康復。


  • 關節位或是容易拉扯既地方,結焦時要特別注意動作不宜過大,紋身後應避免運動,以免結痂裂開。


  • 紋身未康復請盡量唔好曬太陽。康復後如要進行戶外活動請緊記揸防曬,最好選擇SPF 35以上的防曬產品。 


  • 紋身康復後仍要注意保養,緊記揸LOTION保濕KEEP好個紋身!


For English Version, Please visit:


https://www.theparlourtattoohk.com/aftercare